|
Y alufré como baixabas
como correbas
como redibas.
Y ba sentir como'l mío corazón
blincaba,
s'esfeba,
d'astí se'n iba.
Marché por as carreras
pregunté lo tuyo nombre
beluns callaban atros deziban
no conoixer-lo
y esconoixiu, por toz en yera.
Me'n fue d'as casas
baixé lo río
y torné a trobar-te
en a chiqueta gorga
meyo espullada,
nomás as sayas
que tremolosas fluyiban
yeran, profes, a esbruma y l'augua.
Y sin salir-ne me diziés
gritando a los aires calidos
que me querebas.
Y alabez rebellé
d'ixa nuei estrania,
paré cuenta goyoso
que lo que yo quereba
no yera garra muller
que yo a l'amor amaba.
|
Ya plega lo día,
o día d'a boda, sí, ya plega,
o nobio chifla toda la nuei
y a nobia siente los chuflius.
Plega ya lo día que asperábanos
a luz se chita tardi
y l'orache nos ayoya.
Pero sin dembargo belún plora
sí, belún plora.
A tamás d'o sol, a plebia, l'aire,
a tamás d'ixo plora.
Ya plega lo día d'a boda
as flors fan morisquetas
os cremallos uloran a inzienso,
as belas a zera,
as carreras a esprito
de bin, de duelo.
Ya plega lo día, ya plega la boda
o mundo chira
beluns riden
atros ploran.
|
|
Cuan dixé lo barco
un soflo de boira
fredo y preto
me dizió canso dezaga la orella
güe t'he bisto morir, biello.
Y agora zaga lo beire
te beigo mozeta de proba
te beigo, inamorau,
como lo primer día.
Te dié la bida
y astí, escamallau
nomás me queda una cosa
A-mar. |
Iste ye o mío testamento.
A mía zaguer ideya,
bel pensamiento,
u asperanza,
u deseyo,
ilusión,
conzieto.
O tiempo pasa,
y s'escorre a escape
entre l'esbarizoso beire
d'un reloch granizo d'arena.
|
